ليالي الزايف شعر - محمد عبدالصادق | جريدة عزف الأقلام العربية

وأنا مصدق ليالي الزايف ..

ولابسي تقيل ف عز الصيف ..

ولابسي خفيف ف عز البرد ..

وتبقي روحي زي قميص .. 

يكون متني قابل للفرد ..

فامش ممكن تقاوي الكوسا ..

تطرح ورد ..

ومش ممكن أبيات الشعر تسندني ..

ولا صلاتي و أنا خايف هتنجدني ..

مدام ساكت علي ظلم الظلام فيا ..

ليك الحق تحلبني ..

بتصنع عجل من دهبي ..

واركع أشكي ذولي أليه ..

وقول طيب أقول حاضر ..

كما دومية ..

ف أيد باشا يخدها البيه ..

البيه يصبح كمان باشا ..

سيناريو وعرض متكرر ..

وأنا مصدق ليالي الزايف ..

وملكي بس مش ملكي ..

فلازم أكون مجرد ضيف ..

فا م العادي ..

أكون سجان وأنا المسجون ..

وم العادي ..

أعيش العمر ف البدروم ..

عنواني ف ورقة مختومة بختم النسر ..

لو غلط ف العنوان ..

مكاني ونمتي جوه القسم ..

ويمكن قبر ..

وملتني ليالي الصبر ..

دي حتي الشمس نسيتني ..

وجعلت نورها بفاتورة ..

ومهما عضمي يدغدغ ..

بحمد بأسمه مستورة ..

ما أنا خايف ..

ونظري عشرة علي عشرة ..

وفيا عيون ..

بشوف لكني مش شايف ..

--------------------------------------

#بتصنع عجل من دهبي .

قلم - محمدعبدالصادق